سوّ اللي براسك و لاتذكر أسباب
.................لاصرت بايعني توكّل على الله
ما بيني و بينك مشاريه وعتاب
................شف دربك اللي جيت منّه تدلّه
ما راح تغلبني لو الحب غلاب
................من حضرتك عشان قلبي تذلّه؟؟
في ذمتي لأجعلك عبره للأحباب
.................لين الخليل يتوب عن جرح خلّه
زلاتك اللي مانفع فيهن حساب
...............لاجيت أعددهن على القلب علّه
أحرجتني بين القرايب والأحباب
..................كنّ الجفا سيفٍ بوجهي تسلّه
ماكنت أقصر فيك من كثر الاعجاب
..................يومك تساوي عندي الكون كلّه
كنت القريب وكلهم كانوا أغراب
.................حتى القمر لاغاب شفتك محلّه
خلاص لاترجع ترى خاطري طاب
...................الخاطر اللي كنت عايش بظله
رح و اعتبرني واحدٍ اذنب وتاب
...................ماني بثوبٍ تلبسه ثم تملّه
ما يجتمع بالحب صادق وكذّاب
.............رزقي على الله و انت رزقك على الله

عطاالله فرحان

سلمت بقايا حي على الاختيار ويعطيك العافية